कथा प्रकाशित करण्यापूर्वी हे नक्की वाचा!

27 ऑगस्ट 2026

प्रिय लेखक,

तुमच्या कथा प्रतिलिपिवर सुरक्षित कशा ठेवाव्यात ते इथे जाणून घ्या.

AI वापराबाबत नियमावली:

तुमचे व्याकरण, शुद्धलेखन तपासण्यासाठी किंवा योग्य कथारचना तयार करणे, एकूण कथानकावर विचारमंथन करणे यासारख्या कल्पक कामांसाठी AI चा वापर करणे नेहमीच स्वागतार्ह आहे.
विशेषतः जेव्हा एक लेखक म्हणून तुम्हाला लेखनात (रायटर ब्लॉक) अडथळा येतो, तेव्हा AI तुमचा सर्जनशील सहाय्यक बनू शकतो.
तुमच्या कथेचे कव्हर ईमेज तयार करण्यासाठीही तुम्ही AI चा कल्पकरित्या वापर करू शकता.
मूळ लेखकाच्या परवानगीशिवाय, AI द्वारे तयार केलेला आणि दुसऱ्या लेखकाच्या कॉपीराइट साहित्याचे अनुवाद/ रूपांतर असलेला मजकूर प्रकाशित करणे प्रतिबंधित आहे.
पूर्णपणे AI च्या मदतीने तयार केलेले साहित्य स्वतःचे मूळ लेखन म्हणून सादर करणे टाळावे. जेव्हा सर्जनशील काम मुख्यतः AI ने केलेले असते, तेव्हा छोटे बदल केले असले तरी ते साहित्य AI-निर्मित साहित्य म्हणूनच गणले जाते.

प्रौढ किंवा अश्लील साहित्याबाबत नियमावली:

जे साहित्य केवळ वाचकाला लैंगिकदृष्ट्या उत्तेजित करण्यासाठी लिहिलेले आहे आणि ज्यात कथानक, पात्रे किंवा कलात्मक उद्देश नाही, असे साहित्य ते कितीही चांगले लिहिलेले असले तरी ते प्रकाशित करण्यास परवानगी नाही.
तुमच्या कथेत कुठेही लैंगिक कृतींचे स्पष्ट किंवा अश्लील वर्णन करू नका किंवा शरीराच्या अवयवांसाठी अश्लील शब्द वापरू नका.
कथेच्या कव्हर इमेजमध्ये कधीही नग्नता किंवा लैंगिकदृष्ट्या सूचक पोझ असू नयेत. कथेतील मजकूर कोणताही असला तरी हा नियम कठोरपणे आणि कोणताही अपवाद न करता लागू होतो.
संमतीशिवाय केलेल्या लैंगिक कृती, लैंगिक हिंसा किंवा अल्पवयीन मुलांशी संबंधित कोणत्याही लैंगिक कृतीचे समर्थन, उदात्तीकरण किंवा त्याला योग्य ठरवून त्याचे सादरीकरण करणे हा एक गंभीर गुन्हा आणि धोरणाचे उल्लंघन आहे.
वरील सर्व उल्लंघनांमुळे साहित्य प्लॅटफॉर्मवरून कायमस्वरूपी हटवणे, दृश्यमानता मर्यादित करणे किंवा वारंवार नियम उल्लंघन केल्यास प्रोफाइलवर कारवाई होऊ शकते.

साहित्य चोरीबाबत नियमावली:

केवळ तुम्ही स्वतः लिहिलेलेच साहित्य प्रकाशित करा.
पुस्तके, टीव्ही मालिका, वेब सिरीज, ब्लॉग्स किंवा इतर कोणत्याही प्रकाशित स्त्रोततून साहित्य पूर्णपणे किंवा काही शब्दांची फेरफार करून, अंशतः कॉपी करून ते स्वतःचे साहित्य म्हणून प्रकाशित करण्यास परवानगी नाही.
जरी कॉपीराइट उल्लंघनाच्या कठोर कायदेशीर व्याख्येत बसत नसले तरीही दुसऱ्याचे काम, साहित्यातील प्रसंगानुसार जवळजवळ तसेच पुन्हा लिहिणे किंवा संदर्भ घेऊन वरवरचे बदल करून त्यांचे कथानक, पात्रे किंवा कथारचना पुन्हा वापरणे, हेही साहित्यचोरी म्हणून गणले जाते.
दुसऱ्या लेखकाचे काम वेगळ्या भाषेत अनुवाद किंवा रूपांतर करण्यासाठी त्यांची आधी लेखी परवानगी आवश्यक आहे. मूळ लेखकाचे श्रेय दिले असले तरीही परवानगीशिवाय अनुवादित साहित्य प्रकाशित करणे हेदेखील नियमाचे उल्लंघन आहे.
मूळ लेखकाचे श्रेय देणे म्हणजे परवानगी नाही. श्रेय देऊन दुसऱ्याचे काम पुन्हा शेअर करण्यासाठीही त्यांची संमती आवश्यक आहे.
तुम्ही प्रकाशित केलेले प्रत्येक साहित्य आपोआप प्रतिलिपिवरील इतर साहित्यासोबत तपासले जाते. जर तुमचे साहित्य दुसऱ्याच्या लेखनाशी जुळत असेल, तर मूळ लेखकाने तक्रार केली नसली तरी तो मजकूर प्लॅटफॉर्मवरून काढून टाकला जाऊ शकतो.
कारवाईमध्ये साहित्य ड्राफ्ट स्थितीत नेणे, ते कायमचे हटवणे किंवा वारंवार उल्लंघनानंतर प्रोफाइल ब्लॉक करणे यांचा समावेश असू शकतो. औपचारिक कॉपीराइट तक्रारींमुळे अतिरिक्त कायदेशीर प्रक्रिया सुरू होते आणि लेखकाविरुद्ध कायदेशीर कारवाईदेखील होऊ शकते.

द्वेषपूर्ण सहित्यासाठी नियमावली:

कोणत्याही विशिष्ट व्यक्तीला किंवा समूहाला, मग ते वाचक असोत, दुसरे लेखक असोत किंवा सार्वजनिक व्यक्तिमत्त्व असोत, त्यांना लक्ष्य करण्यासाठी, अपमानित करण्यासाठी, दुखावण्यासाठी, धमकी देण्यासाठी किंवा त्रास देण्यासाठी तुमच्या कथा, समीक्षा, चॅट किंवा सदर प्रोफाइल तपशीलांचा वापर करू नका.
जातिभेद, जातीय तणाव, घरगुती हिंसा किंवा बालविवाह यासारखे कठीण सामाजिक विषय काल्पनिक कथेत मांडणे चुकीचे नाही. मात्र त्याचा उद्देश ही प्रथा उघड करणे किंवा तिच्यावर प्रश्न विचारणे हा असावा तिचे समर्थन करणे नव्हे.
कोणत्याही व्यक्ती, समुदाय, धर्म, जात, लिंग किंवा लैंगिक अभिमुखतेविरुद्ध हिंसा, द्वेष, अत्याचार किंवा भेदभाव सामान्य वाटवणारे, उदात्तीकरण करणारे किंवा त्याचे समर्थन करणारे साहित्य प्रकाशित करण्यास परवानगी नाही.
तुमचे प्रोफाइल नाव, फोटो किंवा बायोसह कुठेही अपशब्द, राजकीयदृष्ट्या तेढ निर्माण करणारे साहित्य, द्वेषमूलक चिन्हे किंवा कोणत्याही समूहाविरुद्ध द्वेष किंवा हिंसा भडकवणारी, चिथावणीखोर भाषा वापरू नका.
कट्टरपंथी सिद्धांत पसरवणारा, ऐतिहासिक तथ्ये विकृत करणारा किंवा एक समूह दुसऱ्यापेक्षा श्रेष्ठ किंवा कनिष्ठ असल्याचा दावा करणारा गैर-काल्पनिक मजकूर प्रकाशित करू नका.
अल्पवयीन मुलांचे लैंगिकीकरण करणारे, बालविवाहाचे समर्थन करणारे किंवा महिलांवरील लैंगिक किंवा शारीरिक हिंसेचे उदात्तीकरण करणारे साहित्य, अशा प्रकारच्या साहित्याबाबत प्रतिलिपिचे कठोर धोरण आहे आणि अशा उल्लंघनांवर आवश्यक ती कारवाई केली जाते.
नियमांचे उल्लंघन किती गंभीर आहे, त्यानुसार आम्ही योग्य ती कारवाई करू शकतो. यामध्ये चेतावणी देणे, संबंधित साहित्य हटवणे किंवा गरज पडल्यास प्रोफाइल कायमचे ब्लॉक करणे यांचा समावेश असू शकतो. बेकायदेशीर मजकूर आढळल्यास, कोणतीही पूर्वसूचना न देता प्रोफाइल ब्लॉक केले जाऊ शकते आणि आवश्यक असल्यास संबंधित अधिकाऱ्यांना त्याची माहिती दिली जाऊ शकते.